Die George Landbouskou nooi besighede, organisasies en hul werknemers om deel te neem aan die tweede jaarlikse Besigheidsaflos wat op Donderdag, 28 Augustus 2026 om 18:00 op die skouterrein aangebied word.
Na die sukses van die eerste Besigheidsaflos word nog groter deelname van plaaslike ondernemings verwag. Die geleentheid bied ‘n uitstekende geleentheid vir spanbou, gesonde kompetisie en netwerke tussen besighede in die Garden Route.
Deelnemers kan inskryf vir die hardloop- of stapafdeling. Hardloopspanne bestaan uit ses lede teen ‘n inskrywingsfooi van R180 per span, terwyl stapspanne uit vier lede bestaan teen R120 per span.
Elke aflosbeen is 1 kilometer lank, wat die geleentheid toeganklik maak vir deelnemers van verskillende fiksheidsvlakke. Gemengde hardloopspanne moet uit drie mans en drie vroue bestaan, terwyl daar geen geslagsbeperking op stapspanne van toepassing is nie.
Volgens die reëls moet besigheidspanne uit bona fide werknemers van die betrokke onderneming bestaan. Spanne moet ook duidelik identifiseerbaar wees deur middel van klere, kentekens of ander spanidentifikasie. Geen deelnemer mag met oorfone deelneem nie.
Deelnemers mag meer as een span inskryf, maar indien ‘n deelnemer vir meer as een span deelneem, sal daardie spanne nie vir die kategoriepryse kwalifiseer nie. Elke spanlid mag slegs een aflosbeen per span voltooi.
‘n Minimum ouderdom van 9 jaar geld vir alle deelnemers en noodhulpdienste sal gedurende die geleentheid beskikbaar wees.
Elke deelnemer wat die aflos suksesvol voltooi, ontvang ‘n medalje. Spanne en deelnemers moet teenwoordig wees tydens die prysuitdeling, anders kan hulle hul medaljes of pryse verbeur.
“In die moderne besigheidswêreld is spanwerk een van die belangrikste sleutels tot sukses. Die Besigheidsaflos bied ondernemings die geleentheid om daardie spanwerk buite die kantoor te versterk terwyl hulle deel word van die opwinding van die George Landbouskou,” sê die organiseerders.
Inskrywings sluit op 22 Augustus 2026. Elke span moet op ‘n afsonderlike inskrywingsvorm geregistreer word.
Die inskrywingsvorm is beskikbaar by www.georgelandbouskou.co.za.
Maak jou kollegas bymekaar, bou spangees en kom geniet ‘n aand van pret, gesonde kompetisie en gemeenskapsbetrokkenheid tydens die George Landbouskou se 2de Besigheidsaflos.
